សេចក្តីប្រកាសព័ត៌មាន

ស្ថានទូតជប៉ុនប្រចាំព្រះរាជាណាចក្រកម្ពុជា

ថ្ងៃទី៣ ខែវិច្ឆិកា ឆ្នាំ២០១៤

ការប្រគល់ជូនគ្រឿងឥស្សរិយយសព្រះចៅអធិរាជជប៉ុន

 (The Order of the Rising Sun, Gold Rays with Rosette)

ចំពោះ លោក គង់ វន ប្រធានក្រុមប្រឹក្សាភិបាល

នៃអនុវិទ្យាល័យនិងវិទ្យាល័យមិត្តភាពខ្មែរ-ជប៉ុនខេត្តព្រៃវែង

និងជាប្រធានមូលនិធិខ្មែរជំនួយការសិក្សា (CEAF)

នៅ ថ្ងៃទី៣ ខែវិច្ឆិកា ឆ្នាំ២០១៤ រដ្ឋាភិបាលជប៉ុនបានប្រកាសជាផ្លូវការនូវឈ្មោះជនបរទេសដែលជាអ្នកទទួលបានគ្រឿងឥស្សរិយយសនៃព្រះចៅអធិរាជជប៉ុនប្រចាំនៅសរទរដូវឆ្នាំ២០១៤។ ក្នុងចំនោមអ្នកទទួលដែលជាជនបរទេសចំនួន៥៧នាក់ លោក គង់ វន ប្រធានក្រុមប្រឹក្សាភិបាលនៃអនុវិទ្យាល័យនិងវិទ្យាល័យមិត្តភាពខ្មែរ-ជប៉ុនខេត្តព្រៃវែង និងជាប្រធាននៃមូលនិធិខ្មែរជំនួយការសិក្សានៅកម្ពុជា (CEAF) បានទទួលបាននូវគ្រឿងឥស្សរិយយសព្រះចៅអធិរាជជប៉ុនមេដាយប្រភេទThe Order of the Rising Sun, Gold Rays with Rosette ជាការទទួលស្គាល់នូវការចូលរួមចំណែកដ៏ធំធេងដល់ការអភិវឌ្ឍន៍ការអប់រំភាសាជប៉ុននៅប្រទេសកម្ពុជា និងការពង្រីកការយល់ដឹងអំពីគ្នាទៅវិញទៅមករវាងប្រទេសជប៉ុននិងប្រទេសកម្ពុជា។

• គ្រឿងឥស្សរិយយស: គ្រឿងឥស្សរិយយសព្រះចៅអធិរាជជប៉ុន

(The Order of the Rising Sun, Gold Rays with Rosette)

• បរិចារកិច្ច: ចូលរួមចំណែកលើការអភិវឌ្ឍន៍ការអប់រំភាសាជប៉ុននៅប្រទេសកម្ពុជានិងការពង្រឹងការយល់ដឹងអំពីគ្នាទៅវិញទៅមករវាងប្រទេសជប៉ុននិងកម្ពុជា។
• ឈ្មោះអ្នកទទួល (អាយុ): គង់ វន (៧៧ឆ្នាំ)
• មុខតំណែងសំខាន់ៗ:
  • ប្រធានក្រុមប្រឹក្សាភិបាលនៃអនុវិទ្យាល័យនិងវិទ្យាល័យមិត្តភាពខ្មែរ-ជប៉ុនខេត្តព្រៃវែង
  • ប្រធាននៃមូលនិធិខ្មែរជំនួយការសិក្សានៅកម្ពុជា (CEAF)
• អាស័យដ្ឋាន (សញ្ជាតិ): ផ្ទះ២១Eo, ផ្លូវ៤៩៦, ខ័ណ្ឌចំការមន, ភ្នំពេញ (កម្ពុជា)

លោក គង់ វន បានធ្វើការឱ្យសារព័ត៌មានជប៉ុននៅក្នុងប្រទេសកម្ពុជាពីកំឡុងឆ្នាំ១៩៧០ដល់ឆ្នាំ១៩៧៥។ បន្ទាប់ពីបានឆ្លងកាត់ភាពលំបាកនៃការងារពលកម្មដោយការបង្ខិតបង្ខំរយៈពេលជាង៤ឆ្នាំ ក្នុងកំឡុងសម័យកម្ពុជាប្រជាធិបតេយ្យ (ខ្មែរក្រហម) លោកបានភៀសខ្លួនទៅកាន់ប្រទេសជប៉ុន និងបានរស់នៅទីនោះក្នុងនាមជាជនភៀសខ្លួននយោ បាយក្នុងឆ្នាំ១៩៨១។ លោកបានបង្កើតមូលនិធិខ្មែរជំនួយការសិក្សានៅកម្ពុជា (CEAF) ក្នុងឆ្នាំ១៩៩៣ និងចាប់ផ្តើមធ្វើជាប្រធានមូលនិធិដោយបានសាងសង់សាលារៀនចំនួន៥នៅក្នុងប្រទេសកម្ពុជាជាបន្តបន្ទាប់។ លោកបានបង្កើតនូវសមិទ្ធិផលដ៏អស្ចារ្យក្នុងកិច្ចការកែលម្អប្រព័ន្ធអប់រំនៅក្នុងប្រទេសកម្ពុជា តាមរយៈការនែនាំឱ្យមាននូវប្រព័ន្ធសិក្សាតាមបែបប្រទេសជប៉ុន និងការបង្រៀនភាសាជប៉ុនក៏ដូចជាការផ្សព្វផ្សាយអំពីកេរ្តិ៍ឈ្មោះនៃប្រទេសជប៉ុននិងប្រព័ន្ធសិក្សាប្រទេសជប៉ុននៅក្នុងប្រទេសកម្ពុជាផងដែរ។

ក្នុងឆ្នាំ១៩៩៩ លោក គង់ វន បានសាងសង់អនុវិទ្យាល័យនិងវិទ្យាល័យមិត្តភាពខ្មែរ-ជប៉ុនខេត្តព្រៃវែងនិងបានចាប់ផ្តើមធ្វើជាប្រធានក្រុម ប្រឹក្សាភិបាលរបស់វិទ្យាល័យ។លោកបានអញ្ជើញគ្រូស្ម័គ្រចិត្តភាសាជប៉ុនពីប្រទេសជប៉ុន និងបានចូលរួមចំណែកលើកកំពស់ការសិក្សា ភាសាជប៉ុននៅក្នុងខេត្តព្រៃវែង។ អនុវិទ្យាល័យនិងវិទ្យាល័យមួយនេះគឺជាសាលារៀនតែមួយគត់នៅក្នុងប្រទេសកម្ពុជា ដែលមានកាល វិភាគ ការបង្រៀនភាសាជប៉ុននៅក្នុងថ្នាក់នៃកំរិតអនុវិទ្យាល័យនិងវិទ្យាល័យ ហើយចំនួនយុវជនខ្មែរដែល និយាយភាសាជប៉ុនត្រូវបាន បង្កើតឡើងតាមរយៈអនុវិទ្យាល័យនិងវិទ្យាល័យមួយនេះជារៀងរាល់ឆ្នាំ។

លោក គង់ វន មានសេចក្តីអំណរគុណយ៉ាងខ្ពង់ខ្ពស់ចំពោះប្រព័ន្ធអប់រំប្រទេសជប៉ុនដែលជំរុញឱ្យលោកពាំនាំនូវចំនុចល្អៗទាំងនេះ មកអនុវត្តនៅក្នុងការអប់រំនៃអនុវិទ្យាល័យនិងវិទ្យាល័យមិត្តភាពខ្មែរ-ជប៉ុនមួយនេះ។ លោកបានខិតខំព្យាយាមពន្យល់និងពង្រីកនូវការគោរពក្នុងចំណោមប្រជាជនកម្ពុជាចំពោះប្រទេសជប៉ុននិងប្រជាជនជប៉ុន និងការបង្ហាញនូវកេរ្តិ៍ឈ្មោះនៃប្រព័ន្ធអប់រំប្រទេសជប៉ុន ឱ្យបានទូលំទូលាយនៅក្នុងប្រទេសកម្ពុជា តាមរយៈសកម្មភាពជាច្រើនទាំងនេះ។

លោក គង់ វន ក៏បានបង្កើតឱ្យមាននូវកម្មវិធីបំលាស់ប្តូរយុវជនរវាងកម្ពុជានិងជប៉ុននិងបានដើរតួនាទីដឹកនាំដ៏ សំខាន់ក្នុងការលើកកំពស់ ការយល់ដឹងអំពីគ្នាទៅវិញទៅមក និងចំណងមិត្តភាពរវាងប្រទេសទាំងពីរ។

លោកគង់វនបានធ្វើការឱ្យសារព័ត៌មានជប៉ុនពីកំឡុងឆ្នាំ១៩៧០ដល់១៩៧៥និងបានធ្វើរបាយការណ៍ដ៏ជាក់លាក់និងទាន់ហេតុការណ៍អំពីស្ថានភាពឥណ្ឌូឆាយណា នាពេលនោះជូនប្រជាជនជប៉ុន។ លោកក៏បានបោះពុម្ពសៀវភៅដែលបកស្រាយអំពីបទពិសោធន៍របស់លោកក្នុងកំឡុងសម័យកម្ពុជាប្រជាធិបតេយ្យហើយបន្ទាប់ពីនោះលោកក៏បានចូលរួមចំណែកដ៏ធំធេងក្នុងការលើកកម្ពស់ការសិក្សា អំពីប្រវត្តិសាស្រ្តសម័យទំនើបនៃប្រទេស  កម្ពុជាក្នុងចំនោមអ្នកប្រវត្តិសាស្រ្តនិងអ្នកស្រាវជ្រាវជនជាតិជប៉ុនជាច្រើនផងដែរ។